Xəzər Rayon İcra Hakimiyyətinin başçısı və Milli Məclisin deputatı Buzovna qəsəbə sakinləri ilə səyyar görüş keçiriblər

   Azərbaycan Respublikasının Prezidenti cənab İlham Əliyevin tapşırıqlarına əsasən yerlərdə sakinləri narahat edən məsələlərin araşdırılması və mövcud problemlərin aradan qaldırılması məqsədi ilə mütəmadı olaraq səyyar qəbullar keçirilir.
   30 yanvar tarixində Xəzər Rayon İcra Hakimiyyətinin başçısı Elşən Salahovun Milli Məclisin deputatı Rauf Əliyevlə birgə Buzovna qəsəbəsində sakinlərlə növbəti səyyar qəbulu keçirilib.
  Ruhulla Axundov adına Mədəniyyət evində keçirilən görüşdə rayon İcra Hakimiyyəti başçısının müavinləri, icra hakimiyyəti aparatının şöbə müdirləri, Buzovna qəsəbə inzibati ərazi dairəsi üzrə nümayəndəsi, Buzovna bələdiyyəsinin sədri, xidmət sahələrinin rəhbərləri və sakinlər iştirak ediblər.
  Rayon İcra Hakimiyyətinin başçısı Elşən Salahov respublikada əhalinin rifah halının yüksəldilməsi istiqamətində həyata keçirilən sosial-iqtisadi islahatlar, eyni zamanda, Xəzər rayonu ərazisində aparılan abadlıq-quruculuq işləri, sakinlərin rahatlığının təmin olunması, sahibkarlığın inkişafı, vətəndaş məmnunluğunun artırılması istiqamətində görülən işlər barədə məlumat verərək, sakinləri fərdi qaydada dinləyib.
  Sonra Milli Məclisin deputatı Rauf Əliyev çıxış edərək, əhalini narahat edən problemlərlə bağlı dövlət qurumlarına göndərilmiş müraciətlər, onların həlli istiqamətində görülən işlər barədə məlumat verib. Eyni zamanda, səyyar görüş zamanı səsləndirilən məsələlərin həlli ilə bağlı zəruri tədbirlərin görüləcəyini bildirib.
  Sakinlər tərəfindən qaldırılan məsələlərin bir qismi yerindəcə həll olunub, araşdırılmasına ehtiyac olan bir sıra məsələlərin qanunvericiliyə uyğun, operativ həlli üçün müvafiq qurumların rəhbərlərinə tapşırıqlar verilib.