Vətən Müharibəsi şəhidi Hacıyev Elmaz Elmar oğlunun anım mərasimi keçirilib

  Vətən Müharibəsi bizim şanlı tariximiz, şəhidlər və qazilər qürur mənbəyimizdir. Xalqımız və dövlətimiz qəhrəman övladlarının şücaətini daim yüksək qiymətləndirir, şəhidlərimizin ruhuna ehtiramla yanaşır, xatirəsini uca tutur.
   Müstəqil Azərbaycanımızın tarixinə qızıl hərflərlə yazılmış 44 günlük Vətən Müharibəsi şəhidlərinin ailələrinə, qazilərinə Xəzər rayonunda da daim yüksək həssaslıqla yanaşılır, diqqət və qayğı göstərilir.
   Rayon İcra Hakimiyyəti başçısı Elşən Salahov, RİH başçısı aparatının məsul əməkdaşlarının və şəhidin ailə üzvlərinin iştirakı ilə Vətən müharibəsi şəhidi Hacıyev Elmaz Elmar oğlunun şəhadət günündə əziz xatirəsi dərin hörmət və ehtiramla yad olundu.
   Anım mərasimində çıxış edən RİH Başçısı Elşən Salahov şəhidlərin ailələrinə dərin hüznlə başsağlığı verərək, səbr diləmiş, eləcə də Azərbaycan Ordusunun qüdrətindən, şəhidlərimizin döyüş zamanı göstərdikləri şücaət və vətənpərvərliklərindən söz açmış, Ali Baş Komandan cənab İlham Əliyevin rəhbərliyi ilə qəhrəman oğullarımızın həyatları bahasına azad olunmuş torpaqlarımızda bu gün müqəddəs bayrağımızın dalğalanmasının hər birimiz üçün qürurverici olduğunu bildirmişdir.
    Sonda şəhidin ailə üzvləri onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci Vitse-Prezident Mehriban xanım Əliyevaya öz minnətdarlığını bildirmişdir.