Bu gün Vətən müharibəsinin iştirakçısı İbrahimli Adil Asəm oğlunun Şəhidlik zirvəsinə ucaldığı gündən 3 il ötür

   9 sentyabr 1992-ci ildə Sumqayıt şəhərində anadan olub. 2011-ci ildə Cəmşid Naxçıvanski adina hərbi liseyi, 2015-ci ildə Heydər Əliyev adına Azərbaycan Ali Hərbi Məktəbinin Quru Qoşunları fakültəsini, 2016-cı ildə Silahlı Qüvvələrin Təlim və Tədris Mərkəzinin "Zabit ixtisas kursu" nu bitirib.
   Azərbaycan Respublikası Müdafiə nazirinin 26 iyun 2015-ci il tarixli əmri ilə "leytenant” hərbi rütbəsi verilib.
   Motoatıcı taqım komandiri, xüsusi təyinatlı dəstənin xüsusi təyinatlı komandasının baş kəşfiyyatçısı, xüsusi əməliyyat taborunun xüsusi əməliyyat qrupunun baş kəşfiyyatçısı, xüsusi əməliyyat taborunun xüsusi əməliyyat qrupu komandirinin müavini vəzifələrində xidmət edib.
   Silahlı Qüvvələrin Baş Qərargah rəisinin 26 iyun 2018-ci il tarixli əmri ilə "baş leytenant" hərbi rütbəsi verilib.
   Vətən müharibəsinin ilk günündən xüsusi əməliyyatlarda fəal iştirak edib.  Şəxsi raşadət və şücaət nümunələri göstərib.
   2020-ci il noyabrın 2-də Xocavənd rayonu ərazisində gedən hərbi əməliyyatlar zamanı xidməti vəzifələrini yerinə yetirərkən qəhramancasına şəhid olub.
   Sağlığında "Azərbaycan Respublikası Silahlı Qüvvələrinin 95 illiyi (1918-2013)", "Azərbaycan Ordusunun 100 illiyi (1918-2018)", ölümündən sonra isə Azərbaycan Respublikasının ərazi butövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirərkən göstərdiyi qəhrəmanlıq nümunəsinə həmçinin, hərbi qulluq vəzifəsini yerinə yetirərkən igidlik və mərdlik nümayış etdirdiyinə görə Azərbaycan Respublikası Prezidentinin Sərəncamı ilə ona “Vətən Müharibəsi Qəhrəmanı”(ölümündən sonra) adı verilib.
   Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarında iştirak edərək hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikası Prezidentinin Sərəncamı ilə “Vətən uğrunda”(ölümündən sonra), “Şuşanın azad olunmasına görə”(ölümündən sonra), “Kəlbəcərin azad olunmasına görə”(ölümündən sonra), "Xocavəndin azad olunmasına görə"(ölümündən sonra) medalları ilə təltif olunub. Ailəlidir 2 övladı var.                                                           Şəhidimiz II Şəhidlər Xiyabanda dəfn olunub.