Bu gün Vətən müharibəsinin iştirakçısı Abdullazadə Qasım Əli oğlunun Şəhidlik zirvəsinə ucaldığı gündən 3 il ötür
27 iyul 1999-cu ildə Bakının Mərdəkan qəsəbəsində anadan olub. 2005-ci ildə Mərdəkanda yerləşən H.Z.Tağıyev adına 123 nömrəli orta məktəbə gedib, təhsilini 2016-cı ildə İsmayıllı rayonu 1 saylı tam orta məktəbdə başa vurub.
2017-ci il iyulun 27-də həqiqi hərbi xidmətə yola düşüb. 2019-cu ildə hərbi xidmətini tamamlayıb.
Qasım Abdullazadə Vətən müharibəsi zamanı cəbhənin bir çox istiqamətlərində döyüşlərdə iştirak edərək, şücaət göstərib. 21 oktyabr 2020-ci ildə Füzulidə qəhrəmancasına şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin Sərəncamına əsasən Qasım Abdullazadə ölümündən sonra "Vətən uğrunda" medalı ilə təltif edilib.
Eyni zamanda Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə ölümündən sonra "Füzulinin azad olunmasına görə" medalı ilə də təltif edilib.
Şəhidimiz Xəzər rayonunun Mərdəkan qəsəbəsində dəfn olunub.
