Binə qəsəbə sakinləri ilə növbəti səyyar görüş keçirildi.

       Xəzər Rayon İcra Hakimiyyətinin başçısı Gülağa İslamovun Binə sakinlərilə növbəti səyyar görüşü keçirildi.
Görüşdə Azərbaycan Respublikası “Azərsu” Açıq Səhmdar Cəmiyyəıtinin Sədr müavini Etibar Məmmədov,    Rayon İcra Hakimiyyəti başçısının birinci müavini, Aparatın şöbə müdirləri, rayonun idarə, müəssisə və təşkilatlarının, xidmət sahələrinin rəhbərləri və qəsəbə sakinləri iştirak etdilər.
   Görüşü rayon İcra Hakimiyyətinin başçısı cənab Gülağa İslamov açaraq Azərbaycan Respublikasının   Prezidenti cənab İlham Əliyevin tapşırıq və tövsiyələrinə uyğun olaraq dövlət proqramlarının uğurla icrası nəticəsində Xəzər rayonunda abadlıq-quruculuq, yenidənqurma işlərinin sürətlənməsi, əhaliyə göstərilən sosial xidmətlərin həcminin və keyfiyyətinin yaxşılaşması istiqamətində bir sıra mühüm nailiyyətlərin əldə edildiyini, yolların salınması və əsaslı təmir edilməsini, nəqliyyatın işinin yaxşılaşdırılması, elektrik enerjisi, qaz, istilik, su təchizatı və kanalizasiya xidmətlərinin keyfiyyətinin yüksəldilməsi sahələrində çox vacib və əsaslı sosial infrastruktur layihələrinin həyata keçirildiyini vurğuladı.
    Görüşdə “Azərsu” Açıq Səhmdar Cəmiyyəıtinin Sədr müavini Etibar Məmmədov çıxış edərək rayonun digər qəsəbələri ilə yanaşı Binə qəsəbəsində də içməli su xətlərinin çəkilməsi işlərinin uğurla həyata keçirildiyini, lakin bu prosesin mərhələli şəkildə olduğunu, yaxın gələcəkdə qəsəbənin əksər küçələrini əhatə edəcəyini bildirdi.
   Qəsəbə sakinləri çıxış edərək ərazidə gedən abadlıq və quruculuq işlərinə görə ölkə rəhbərliyinə minnətdarlıqlarını bildirdilər və onları narahat edən bəzi nöqsan və çatışmazlıqların aradan qaldırılmasını xahiş etdilər.
      Sonda Rayon İcra Hakimiyyətinin başçısı Gülağa İslamov  sakinlər tərəfindən qaldırılan məsələlərin həlli ilə əlaqədar aidiyyəti qurum rəhbərlərinə yerindəcə tapşırıqlar verdi.