Xəzər rayonunda dini icma nümayəndələri ilə görüş keçirilmişdir.

       17.10.2014 Azərbaycan Respublikası Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı  Xəzər rayonunda dini icmaların nümayəndələri ilə görüş keçirib.  Görüşdən öncə Mübariz Qurbanlı və Xəzər rayon İcra Hakimiyyətinin başçısı Gülağa İslamov Azərbaycan xalqının Ümummilli Lideri Heydər Əliyevin abidəsini ziyarət edərək abudə önünə gül dəstələri qoymuşlar .
      Tədbiri giriş sözü ilə açan Xəzər rayon İcra Hakimiyyətinin başçısı Gülağa İslamov Dövlət Komitəsinin dini icmalarla bu görüşünün əhəmiyyətini vurğulayaraq qeyd etdi ki, belə görüşlər dövlət-din arasında mövcud sıx münasibətlərin daha da inkişaf etməsinə xidmət edir. 
      Daha sonar tədbirdə iştirak edən  DQİDK-nın Bakı şəhəri üzrə şöbə müdiri Anar Kazımov çıxış edərək rayondakı dini durum, dini icmalar, eləcə də məscid və ziyarətgahlarla bağlı geniş məlumat Verdi və  qeyd etdi ki, müxtəlif dini konfessiyaların yaşadığı rayonda icmalar arasında tolerant münasibətlər mövcudluqunu görüş iştirakçılarının diqqete çatdırdı .
      Xəzər rayonundan olan millət vəkili  Rauf Әliyev öz çıxışında bildirdi ki, müstəqilliyini əldə etdikdən sonra Azərbaycanda bütün sahələrdə olduğu kimi, dini sahədə də xeyli dəyişikliklər baş vermişdir. Biz Sovet dövründə dinə qarşı böyük basqıları müşahidə edirdiksə, müstəqillikdən sonra bu basqılar aradan qaldırılıb, dövlət-din münasibətlərini tənzimləyən qanunlar qəbul edilib, həm də konstitusiyamızda bu məsələlər öz əksini tapıb. 
Dövlət Komitəsinin sədri Mübariz Qurbanlı çıxış edərək bildirib ki, müstəqilliyimizin bərpasından sonra xalqımızın milli-mənəvi dəyərlərinə qayıdışı prosesi sürətlənib. Dövlət Komitəsinin sədri bu istiqamətdə Ümummilli Lider Heydər Əliyevin müstəsna xidmətlərini qeyd edib və hazırda Prezident İlham Əliyevin milli-mənəvi dəyərlərimizin inkişafı istiqamətində həyata keçirdiyi işlərdən danışıb.
M.Qurbanlı qeyd edib ki, Azərbaycan unitar, hüquqi, demokratik və dünyəvi dövlətdir: "Ölkədə dünyəvilik konstitusiyada öz əksini tapıb və bununla yanaşı “Dini etiqad azadlığı” haqqında qanun da qəbul edilib. Bu qanun da cəmiyyətimizdə fərdlərlə, dini icmalarla dövlət arasındakı münasibətləri nizamlayır. DQİDK-nin təsis olunmasının başlıca məqsədi dövlət-din münasibətləri, o cümlədən dini icmaların fəaliyyətini nizamlamaqdan ibarətdir. Burda bir incə məqam var. Dövlət dindən ayrı olsa da, dindar dövlətdən ayrı deyil. Hər bir dindar istər-istəməz dövlətlə təmasda olmaq məcburiyyətindədir. Hesab edirik ki, bu gün Azərbaycanda dövlət-din münasibətləri normal məcrada inkişaf edir. Ölkəmizdə istənilən dini icmanın azad fəaliyyətinə tam şərait var. Azərbaycan tolerantlıq baxımından dünyanın ən qabaqcıl ölkələri sırasındadır. Tolerantlığın təminatı üçün hökumət tərəfindən müəyyən addımlar atılıb. İstər paytaxtda, istərsə də bölgələrdə dini münasibətlərlə bağlı təhlillər aparsaq, xristian, müsəlman, yəhudi dini icmalarının paralel şəkildə dinc yanaşı mövcud olduğunu görə bilərik".
Çıxış edən din xadimləri son vaxtlarda Dövlət Komitəsi tərəfindən həyata keçirilən tədbirləri yüksək qiymətləndirdiklərini söyləyiblər.  
      Sonda M. Qurbanlı tədbir iştirakçılarını maraqlandıran sualları cavablandırıb.