`
2017-ci ilin I yarımilliyində Xəzər rayonunun
sosial-iqtisadi inkişafının yekunlarına dair
HESABAT
12 iyul 2017-ci il tarixində Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclası keçirilmişdir. Ölkə başçısı 6 ay ərzində iqtisadi ishalatların daha da sürətlə aparılmasını və bu sahədə bir çox sərəncam və qanunların imzalanaraq qəbul edilməsini qeyd etmişdir. Biznes mühitinin yaxşılaşdırılması, ixrac potensialının artırılması, xarici sərmayənin Azərbaycana cəlb edilməsi, yerli istehsalın artırılması, bütün bu istiqamətlər üzrə çox ciddi qərarlar qəbul edilmişdir. Cənab Prezident 6 ay ərzində qeyri-neft sektorunun 4,4 % , kənd təsərrüfatının 2,2 %, ticarət dövriyyəsinin 36 % , qeyri-neft məhsullarının ixraçının 27 % artmasını, idxalın isə 15 % azalmasını xüsusi qeyd etmişdir. Eyni zamanda valyuta ehtiyatlarımızın 2017-ci ilin 6 ayı ərzində 3 milyard artaraq bu gün 40.6 milyard dollara çatması da qeyd edilmişdir.
Cənab Prezident çıxışında 6 ay ərzində 24 min iş yerinin bağlanmasına baxımayaraq 122 min yeni iş yerinin açılmasını da qeyd etmişdir. Həqiqətən də 2017-ci ilin 6 ayının yekunları onu göstərir ki, Azərbaycan iqtisadiyyatı çox dinamik şəkildə inkişaf edir.
Azərbaycan Respublikasının Prezidenti cənab İlham Əliyevin apardığı uğurlu siyasətin nəticəsidir ki, bölgələrlə bərabər Bakıətrafı qəsəbələrin də sosial-iqtisadi inkişafı sürətlə davam etdirilir.
Həmişə olduğu kimi ötən dövrdə də abadlıq və yenidənqurma işləri Xəzər rayonunda uğurla davam etdirilmişdir.
2017-ci ilin 6 ayı ərzində rayonun iqtisadi və sosial həyatında baş verən pozitiv dəyişikliklər bütün sahələrdə yüksəlişlə müşayiət olunmuşdur. Belə ki, rayon üzrə sənaye məhsulu istehsalı 116 milyon 427 min manat təşkil etmişdir. Sənaye məhsulunun ümumi həcmində dövlət sektorunun xüsusi çəkisi 98,9 % olmuşdur.
Nəqliyyat sektorunda 629 milyon 810 min manatlıq xidmətlər göstərilmişdir ki, bu da ötən ilin eyni dövrü ilə müqayisədə 42 % çox olmuşdur.
Rabitə müəssisəsi tərəfindən idarə, müəssisə və təşkilatlarla, əhaliyə faktiki qiymətlərlə 3 milyon 257 min manatlıq rabitə xidməti göstərilmişdir.
Hesabat dövründə rayonun tikinti kompleksində iqtisadi və sosial sahələrin inkişafı üçün bütün maliyyə mənbələri hesabına 288 milyon 795 min manat məbləğində investisiya cəlb edilmişdir ki, bü da keçən ilin müvafiq dövrünə uyğun göstəricidən 7,4 dəfə çox olmuşdur. İstifadə edilmiş investisiyalardan 7 milyon 400 min manatı tikinti quraşdırma işlərinin yerinə yetirilməsinə sərf olunmuş və əvvəlki ilin müvafiq dövrünə nisbətən 20,4 % təşkil etmişdir.
İstehlak və xidmət bazarlarında əhaliyə 339 milyon 503 min manatlıq istehlak malları satılmış və pullu xidmətlər göstərilmişdir.
Pərakəndə əmtəə dövriyyəsi 190 milyon 672 min manata, pullu xidmətlərin həcmi 148 milyon 830 min manata çatmışdır.
Ticarət şəbəkəsindən satılmış məhsulların 14,6 %-i hüşuqi şəxs kimi fəaliyyət göstərən təşkilatlar, 84,4 %-i isə hüquqi şəxs yaratmadan fəaliyyət göstərən fiziki şəxslər tərəfindən realizə olunmuşdur.
Rayonun iqtisadi və sosial sahələrində işləyənlərin orta aylıq əmək haqqı 650 manat, tikinti sektorunda çalışanların ora aylıq əmək haqqı 238 manat, sənaye sahəsində çalışanların orta aylıq əmək haqqı 474 manat təşkil etmişdir.
Hesabat dövründə rayon üzrə 1984 yeni iş yeri açılmışdır. Bunun 7-si yeni yaradılmış müəssisə və təşkilatlar, 527-i mövcud müəssisə və təşkilatlar, 1448-i isə fiziki şəxslər tərəfindən açılmışdır. Ümumiyyətlə son 14 il ərzində rayon ərazisində 22 min 993 yeni iş yeri açılmışdır.
Dövlət Sosial Müdafiə Fondunun Xəzər rayon şöbəsində 2017-ci ilin 6 ayı ərzində 796 nəfər fərdi sahibkarlıq fəaliyyəti ilə məşğul olan sığorta edən qeydiyyatdan keçmişdir. Hal-hazırda 17413 nəfər əmək pensiyaçısına plastik kartlar vasitəsilə pensiya ödənilir.
Azərbaycan Respublikasının Sahibkarlığa Kömək Milli Fondu tərəfindən 16 mart 2017-ci il tarixində Xəzər RİH-nin təşkilatçılığı ilə Mərdəkan qəsəbəsində sahibkarlarla növbəti görüş keçirilmişdir. Fond tərəfindən sahibkarlara istixana kompleksinin tikintisi üçün 3 milyon 200 min manat güzəştli kredit verilmişdir ki, bunun da nəticəsində də 102 yeni iş yerinin açılması nəzərdə tutulmuşdur. Ümumilikdə 2017-ci ilin 6 ayı ərzində 7 sahibkarlıq subyektinə 11 milyon 700 min manat güzəştli kredit verilmiş 260 yeni iş yeri açılmışdır.
Əhalinin Məşğulluğunun təmin etmək məqsədilə Azərbaycan Respublikasının Prezidenti cənab İlham Əliyevin tapşırığına əsasən Xəzər rayonuna 327 ştat vahidi işçi yeri ayrılmış və rayon ərazisində yaşayan, işsiz, aztəminatlı ailələrin üzvlərindən ibarət 327 nəfər işə qəbul edilmişdir. Bütün qəsəbələri əhatə edən həmin işçi qrupları ərazidə park və meydanlarda, yol kənarlarında, məhəllədaxili küçələrdə təmizlik işləri aparır və vaxtı-vaxtında əmək haqqı alırlar.
2017-ci ilin 6 ayı ərzində Rayon Məşğulluq Mərkəzində 1444 nəfər işaxtaran vətəndaş qeydiyyata alınmışdır. Onlardan 611 nəfəri münasib işlə təmin edilmişdir. Hesabat dövründə Mərkəz tərəfindən 188 nəfər işsiz vətəndaşa işsizlik statusu verilmiş və 235 nəfərə işsizlik müavinəti təyin edilmişdir.
Hesabat dövründə rayonun ərazisində tikinti və quruculuq işləri səngiməmiş, daha da geniş vüsət almış, küçə və meydanlar, parklar abadlaşdırılmış, ayrı-ayrı içtimai binalarda, əsas yollarda, daxili küçələrdə təmir işləri aparılmış və yenidən qurulmuş, su və kanalizasiya sistemləri, elektrik xətləri yeniləşdirilmiş, yeni xidmət və istehsal müəssisələri, bir sıra sosial-mədəni obyektlər tikilərək əhalinin istifadəsinə verilmişdir.
Xəzər Rayon İcra Hakimiyyətinin daxili imkanları hesabına Mərdəkan, Şüvəlan və Binə qəsəbələrində səkilərin və hasarların yenidənqurulması, yolboyu milli və tarixi elementlər nəzərə alınmaqla mövcud tikililərin bərpası işləri görülmüşdür.
Belə ki, Şüvəlan qəsəbəsinin Almaz İldırım küçəsi 62 saylı binanın 721 m2 fasadı və yan divarları təmir edilərək emulsiya ilə boyadılmış, o cümlədən binanın 32 m2 fasadı suvanmış, 12 m2 dam örtüyü təmir olunmuş, tüstü bacaları suvanaraq bərpa edilmiş, binanın kürsü hissəsi 105 m2 aqlay daşla üzlənmiş, pəncərələrin kənarına 350 p/m aqlay bəzək daşı vurulmuşdur. Görülən işlərin nəticəsində bina tam görkəmini dəyişmiş və bu da orada yaşayan sakinlərin razılığına səbəb olmuşdur.
Eyni zamanda binanın qarşısındakı istirahət parkında abadlıq işləri görülmüş və demək olar ki, başa çatmaq üzrədir. Belə ki, parkın ərtafındakı hasarın 70 m2 hissəsi mişar daşı ilə hörülərək, səthi 84 p/m aqlay daşla bəzədilmiş və bəzi hissələri emulsiya ilə boyadılmışdır. Parkın ərazisində 365 p/m bardür düzülərək sütunlar aqlay daşla üzlənmiş, 450m2 tamet vurulmuşdur. Ərazidə olan bulaq sökülmüş və orada yeni bulaq tikilərək sakinlərin istifadəsinə verilmişdir. Hal-hazırda həmin ünvandakı 58 və 60 saylı, 2 mərtəbəli binalarda yenidənqurma işləri davam etdirilir.
Mərdəkan qəsəbəsinin Yesenin küçəsində, ATS-in inzibati binasının qarşısındakı 200 metr uzunluğunda hasar sökülərək, yüksək memarlıq üslubunda yenidən qurulmuşdur. Qəsəbənin girişində qəsəbənin adını əks etdirəcək, hündürlüyü 8 metrə qədər olan postamentin bünövrəsi qoyularaq beton və konstruktiv hissəsi yekunlaşmıdır. Tikinti işləri davam etdirilir. Mərdəkan qəsəbəsindəki Zabitlər evinin 144 m2 köhnə hasarları sökülərək yenidən tikilmiş və sütünlar 390 p/m aqlay daşı ilə üzlənmişdir.
Eyni zamanda Rayon İcra Hakimiyyətinin inzibati binasının ətrafındakı hasarın 730 m2 hissəsi təmir edilərək emulsiya ilə boyadılmışdır.
Binə qəsəbəsinin Ə.İsazadə küçəsində, mərkəzi yolun sağ və sol hissəsində , ümumi görünüşə xələl gətirən müxtəlif təyinatlı 13 ədəd tikinti obyektlərinin ümumilikdə 1480 m2 fasadları aqlay daşı ilə üzlənmişdir.
Bu günün ən vacib məsələlərindən biri də yaşıllışların salınması və onlara qulluq edilməsinin təşkilidir. Bildiyiniz kimi 2016-cı il ərzində rayon ərazisində 99320 ədəd müxtəlif növ ağac əkilmiş və 2017-ci ildə də bir o qədər ağac əkilməsi nəzərdə tutulmuşdur. 2017-ci ilin 6 ayı ərzində Mərdəkan qəsəbəsində 1596, Şüvəlan qəsəbəsində 636, Binə qəsəbəsində 583, Türkan qəsəbəsində 7597, Buzovna qəsəbəsində 200, Qala qəsəbəsində 150, Şağan qəsəbəsində 455, Zirə qəsəbəsində isə 5070 ədəd ağac əkilmişdir. Ümumiyyətlə İcra Hakimiyyəti, qəsəbə nümayəndəlikləri və bələdiyyələr tərəfindən 16288 ədəd, «İdeya» İctimai Birliyi və ayrı-ayrı idarə, müəssisə və təşkilatlar tərəfindən isə 25690 ədəd olmaqla cəmi 41978 ədəd ağac əkilmişdir. Hazırda ağacların suvarılması və onlara aqrotexniki qulluq işləri aparılmaqdadır.
Hesabat dövründə rayon ərazisində asfalt yollarının çəkilişi, əsaslı və cari təmiri istiqamətində bəzi işlər görülmüşdür. Belə ki, cənab Prezident İlham Əliyevin tapşırığına əsasən Zirə və Türkan qəsəbələrini birləşdirən yeni yolun çəkilişinə başlanılmış, bərkitmə işləri aparılmış, yolun 2500 mert hissəsinə 7 m enində 17500 m 2 asfalt salınmışdır. Bununla yanaşı Xəzər RİH-nin daxili imkanları hesabına Şağan qəsəbəsində 3720 m2 , Buzovna qəsəbəsində 210 m2, Binə qəsəbəsində 925 m2, Şüvəlan qəsəbəsində 8810 m2, Türkan qəsəbəsində 370 m2 , Zirə qəsəbəsində 1200 m2 , Mərdəkan qəsəbəsində 7013 m2 asfalt örtüyü salınmış, Qala, Türkan, Binə qəsəbələrində isə 16 km yol cari təmir olunmuşdur.
Xəzər rayon Mənzil Kommunal Təsərrüfatı Birliyi tərəfindən 2017-ci ilin 6 ayı ərzində məişət tullantıları meydançalarından 53953 kub.metr məişət və digər bərk tullantıları yığılaraq daşınmışdır.
Birliyin su maşınları ilə 6 ay ərzində xidməti ərazilər, məcburi köçkünlər, idarə və təşkilatlar 16040 ton içməli su ilə təmin edilmişdir.
2017-ci ilin 6 ayı ərzində idarə və təşkilatlardan, məcburi köçkünlərin yaşadığı ərazilərdən, o cümlədən, Birliyin xidmət etdiyi ərazilərdən 4217 ton çirkab maye yığılaraq daşınmışdır.
Cari dövrdə çoxmərtəbəli yaşayış binalarında 135 mənzilin tüstü-bacaları və havadəyişmə kanalları «Təmiz Baca» MMC, 300 mənzilin tüstü-bacaları və havadəyişmə kanalları isə tabelikdə olan MKİS-lər tərəfindən təmizlənmişdir. Buzovna qəsəbəsi, 136 saylı MKİS-in xidmət ərazisində yerləşən 5 ədəd 9 mərtəbəli yaşayış binalarının sərnişin lift təsərrüfatında təftiş işləri aparılmış, lift olan mərtəbələrdə divarlar rənglənmişdir.
Birliyin xidmət ərazilərində yerləşdirilmiş 200 ədəd deformasiyaya uğramış məişət tullantıları konteynerləri təmir edilərək rənglənmişdir.
Mərdəkan-Buzovna yolunun kənarında Birliyə təhkim olunmuş sahələrdə əkilmiş müxtəlif növ ağaclara qulluq göstərilir və vaxtlı –vaxtında suvarılma işləri aparılır.
3 saylı Xüsusi Təyinatlı MKTB-nin 112 saylı MKİS-nin xidməti ərazisində də bəzi işlər görülmüşdür. Belə ki, ərazidə olan binaların dam örtüyünün 600 m2 hissəsi şüşəruberoidlə təmir olunmuş, 70 m2 şüşə dəyişdirilmiş, 10 ədəd qapı yenisi ilə əvəz olunmuş, binaların fasadlarının 500 m2 hissəsi emulsiya ilə rənglənilmişdir.
3 saylı Xüsusi Təyinatlı MKTB-nin 155 saylı MKİS-i tərəfindən B.Əliyev 1, 2, 66 və 70 saylı binaların dam örtüyünun 1000 m2 hissəsi şüşəruberoidlə təmir edilmiş, həmin binaların giriş qapılarının ümumilikdə 400 m 2 hissəsi rənglənilmişdir. S.Yesenin küçəsi 92/2, 8 və 9 saylı binaların 1300 m2 fasad hissəsi emulsiya ilə rənglənilmişdir
Xəzər rayon Sukanal İdarəsi tərəfindən 2017-ci ilin 6 ayı ərzində 6758 p/m müxtəlif diametrli yeni su xətti çəkilmiş, 65 p/m köhnəlmiş su boruları dəyişdirilmişdir. Hesabat dövründə 907 ədəd su qəzası aradan qaldırılmışdır ki, onlardan da 37 ədədi binaların zirzəmilərində baş vermişdir. Rayon ərazisində 1361 ədədi Smart tipli , 1175 ədədi isə mexaniki sayğac olmaqla 2536 ədəd sayğac quraşdırılmışdır. 32 ədədi Smart tipli, 57 ədədi isə mexaniki sayğac olmaqla 89 ədəd sayğac yenisi ilə əvəz olunmuşdur. Su təsərüfatını yaxşılaşdırmaq məqsədilə 14 ədədi “Dalma tipli” olmaqla 15 ədəd su nasosu quraşdırılmış, 29 ədədi “Dalma tipli” olmaqla 81 ədəd su nasosu isə təmir edilərək saz vəziyyətə gətirilmişdir.
Rayon ərazisində kanalizasiya xidmətlərinin yaxşılaşdırılması yönümündə də bir sıra işlər görülmüşdür. Kanalizasiya sahəsi üzrə 1328 ədəd qəza və tutulma halları aradan qaldırılmışdır ki, bu qəzalarda 51 p/m-i binaların zirzəmisində olmaqla 82 p/m kanalizasiya borusu dəyişdirilmişdir. 15 410 p/m-i mexaniki üsulla, 2440 p/m-i isə maşınla olmaqla 17850 p/m kanalizasiya borusu yuyulmuşdur. 7 ədəd kanalizasiya baxış quyusu təmir edilmiş, 1 ədəd baxış quyusu yenisi ilə əvəz olunmuşdur. 35 ədəd yağış barmaqlıqları mütəmadi olaraq təmizlənərək tam istismara yararlı hala gətirilmişdir.
Bundan əlavə rayon ərazisində mövcud olan 78 ədəd içməli su bulağı da daimi su ilə təmin edilir və nəzarətdə saxlanılıraq mütəmadi təmir olunur.
Görülən işlərin nəticəsi olaraq, hal-hazırda 27128 abonent olmaqla 96 392 nəfər əhaliyə içməli su təchizatı və çirkab su xidməti göstərilir ki, bundan da 39,1 %-i, yəni 63 640 nəfər əhali fasiləsiz su ilə təmin olunur.
Bakı Regional Qaz İstismar Sahəsinin Xəzər rayon üzrə Texniki İstismar Xidmətinin ərazilərində itkilərin azaldılması və qaz təchizatının yaxşılaşdırılması üçün nəzərdə tutulan tədbirlər planına əsasən aşagıdakı işlər görülmüşdür:
Türkan qəsəbəsinin Üzümçülük sovxozu ərazisindəki Bağlar yaşayış massivində yeni qaz xəti çəkilmişdir.
Şüvəlan qəsəbəsinin Sahil küçəsində, Maşınqayırma pansionatına gedən yoldan keçən d =76 mm qaz xəttinin 35 p/m deformasiyaya uğramış hissəsi yenisi ilə əvəz olunmuşdur.
Binə qəsəbəsində, Donuzkökəltmə sovxozu və İslah Əmək Müəssisəsinin ətrafındakı qaz xətti əsaslı təmiri olunmuş, 2 ədəd ŞQTM quraşdırılmış, “Şərur” marketin yanında yolun tikinti ərazisinə düşən QTŞ-nın yeri dəyişdirilmişdir. Qala stansiyası ərazisindəki abonentlərin qaz təchizatını yaxşılaşdırmaq məqsədilə uzunluğu L=90 p/m, d 100 mm-lik qaz xətti çəkilmiş və 1 ədəd ŞQTM quraşdırılmışdır. Aynulov küçəsində yaşayan abonentlərin qaz təchizatının yaxşılaşdırılması məqsədilə 1 ədəd ŞQTM quraşdırılmışdır.
Hövsan Südçülük sovxozu ərazisində uzunluğu 90 p/m qaz xətti çəkilmiş və 1 ədəd ŞQTM quraşdırılmışdır.
Mərdəkan qəsəbəsinin R.Cəfərov küçəsində qaz təchizatının yaxşılaşdırılması məqsədilə 1 ədəd ŞQTM quraşdırılmışdır.
Türkan, Binə, Buzovna, Qala, Şağan, Mərdəkan, Şüvəlan qəsəbələrində 98 ədəd qaz tənzimləyici şkaflarında tənzimləmə işləri aparılmışdır.
Xəzər Enerji Təchizatı və Satışı İdarəsi eləcə də Zirə Enerji Təchizatı və Satışı Sahəsi tərəfindən rayon ərazisində elektrik enerjisi ilə təchizatın yaxşılaşdırılması məqsədilə müəyyən işlər görülmüşdür. Belə ki, 2017-ci ilin 6 ayı ərzində 7 ədəd Kompleks Transformator məntəqəsi və 6 ədəd güc təransformatoru dəyişdirilmiş, 3 ədəd yeni Kompleks Transformator Məntəqəsi . 2 ədəd yeni transformator quraşdırılmış, 8 ədəd qoruyucu dəyişdirilmişdir. Bundan başqa 762 ədəd Transtormator və Kompleks Transformator məntəqəsi cari təmir və təftiş olunmuş, 17 ədəd ayırıcı dəyişdirilmiş, 52 ədəd birləşdirici mufta, 24 ədəd dayaq muftası qoyulmuş, 374 ədəd yüksək gərginlikli izolyator, 36 ədəd dayaq dəyişdirilmiş və 148 ədəd yeni dayaq basdırılmışdır.
Eyni zamanda 10570 metr 0,4 kv-luq kabel, 2082 metr y/c-li kabel, 6445 metr Özünü idarəedən kabel və 12800metr naqil çəkilmiş, 450 metr 0,4 kv-luq kabel, 369 metr y/c-li kabel, 2508 metr Özünüidarəedən kabel isə dəyişdirilmişdir. Görülən işlərin nəticəsində bu gün abonentlər fasiləsiz elektrik enerjisi ilə təmin edilirlər.
Hazırkı dövrdə əhalinin rabitə və informasiya texnologiyalarına çıxış imkanlarının daha da yaxşılaşdırılması istiqamətində tədbirlər davam etdirilir. Görülən işlərin nəticəsidir ki, Xəzər rayon Telefon Qovşağının 01.07.2017-ci il tarixinə montaj tutumu 70799 nömrə və abunə tutumu isə 58723 nömrə təşkil etmişdir.
2017-ci ilin 6 ayı ərzində əhaliyə 790 ədəd, müəssisə və təşkilatlara isə 43 ədəd olmaqla, 833 ədəd yeni telefon sənədləşdirilmişdir. Eyni zamanda rayon əhalisinin informasiya texnologiyalarına çıxış imkanlarının daha da yaxşılaşdırılması məqsədilə əhalinin yüksək sürətli internetlə təmin olunması üçün Xəzər Telefon Qovşağının Elektron Avtomat Telefon Stansiyalarında geniş zolaqlı, yüksəksürətli internet avadanlıqları quraşdırılaraq abunəçilərin istifadəsinə verilmiş və 6 ay ərzində qovşağın tutumu 4872 ədəd ADSL artırılaraq ümumi istifadəçilərin sayı 30097 nömrəyə çatdırılmışdır.
“Azərpoçt” MMC-nin 4 saylı Poçt filialı tərəfindən 2017-cı ilin 6 ayı ərzində verilmiş 548410 manat tarif proqnozu faktiki olaraq 571748 manat icra olunmuşdur. Ötən ilin müvafiq dövrü ilə müqayisədə Poçt ödəniş nişanı satışı üzrə 6004 manat, telefon abunə haqlarının yığımı üzrə 8694 manat, elektrik enerjisi haqlarının yığımı üzrə 1675 manat, qaz pulu yığımından 10591 manat, su pulu yığımından 850 manat, pul köçürmələlri üzrə 17024 manat, bank xidmətlərindən 3257 manat gəlir əldə edilmişdir.
Bildiyiniz kimi hazırda rayon ərazisində H.Əliyev Fondu və digər investisiya layihələri çərçivəsində təmir və tikintisi gedən 15 obyekt mövcuddur ki, bunlardan da bəzilərində maliyyə problemlərinə görə işlər müvəqqəti dayandırılmışdır.
Mərdəkan qəsəbəsindəki Müalicə Pansionatı, Dövlət Sərhəd Xidmətinin Xüsusi Məktəbinin yeni korpusu, Şüvəlan qəsəbəsindəki «Şimal» Elektrik Stansiyasının 2-ci blokunun tikintisi, Binə qəsəbəsində Abşeron Peşə Litseyi, Buzovna qəsəbəsində Təhsil Nazirliyinin İdman Tədris Bazası, İdman Mərkəzi, 7 saylı Vərəm Əleyhinə Dispanser, Tibbi Reabilitasiya Mərkəzi, Gindes adına Uşaq Sümük-Vərəm Sanatoriyası, Şağan qəsəbəsində Mədəniyyət Mərkəzi və Şahmat Məktəbi, Zirə qəsəbəsində Qədim tarixə malik kənd hamamı, B.Sərdarov adına zavodun filialı, Türkan qəsəbəsində İdman Mərkəzi, Qala qəsəbəsində GEMS-Dünya Akademiyası, İdman Mərkəzi kimi obyektlərin bəzisində işlər müvəqqəti dayandırılmışdır. Ümid edirik ki, yaxın vaxtlarda təmiri və tikintisi yarımçıq qalan obyektlərdə işlər yenidən başlanılacaqdır.
Hesabat dövründə rəsmi dövlət bayramları və ictimai siyasi əhəmiyyət kəsb edən digər tarixi hadisələrlə bağlı rayon ərazisində geniş ictimaiyyətin iştirakı ilə bir çox kütləvi tədbirlər keçirilmişdir.
Belə ki, yanvar ayının 12-də RİH-nin təşkilatçılığı ilə Mərdəkan Mədəniyyət Sarayının qarşısındakı meydanda gənclərin hərbi xidmətə yola salınması mərasimi keçirilmişdir.
Ən önəmli hadisələrdən biri 13 yanvar tarixində Azərbaycan Respublikasının Prezidenti cənab ilham Əliyevin Türkan qəsəbəsində yerləşən Dövlət Sərhəd Xidməti Sahil Mühafizəsinin Gəmi İnşası və Təmiri Mərkəzinə gəlməsi və orada inşası başa çatan « Tufan» gəmisi və yeni xüsusi texnikalar ilə tanış olmasıdır.
20 yanvar tarixində RİH Aparatı, ictimaiyyət nümayəndələri 20 yanvar hadisəsinin 27-ci ildönümü ilə əlaqədar Şəhidlər Xiyabanına ziyarət etmişlər.
2 fevral tarixində RİH Aparatının nümayəndələrinin, Millət vəkili R.Əliyevin, YAP Xəzər rayon təşkilatının sədri N.Əhmədovun iştirakı ilə Zirə Mədəniyyət Mərkəzi-Eko Parkda Gənclər Günü münasibətilə tədbir keçirilmişdir.
10 fevral tarixində Xəzər RİH-nin Aparatında sahibkarlarla «Azexport.az» portalının əməkdaşlarının birgə tədbiri təşkil edilmişdir.
26 fevral tarixində Bakı şəhərində Xocalı Soyqırımının 25-ci ildönümü münasibətilə keçirilən möhtəşəm yürüş aksiyasında Xəzər rayon ictimaiyyətinin iştirakı təşkil edilmişdir.
2017-ci ilin I yarımilliyində baş vermiş ən önəmli hadisələrdən biri də rayonumuzdan olan Millət vəkili Mehriban xanım Əliyevanın Azərbaycan Respublikasının Prezidenti cənab İlham Əliyevin 21 fevral 2017-ci il tarixli sərəncamı ilə I vitse Prezident təyin olunması olmuşdur. Mehriban xanım Əliyeva I Vitse Prezident kimi ilk səfərini 1 mart 2017-ci il tarixində Türkan qəsəbəsindəki 6 №-li nitqi qüsurlu uşaqlar üçün internat evinə etmiş və orada rayon rəhbərliyi və bir qrup sakinlə görüşərək gələcək planlar barədə çox səmimi söhbət etmişdir.
7 mart tarixində «8 mart Beynəlxalq Qadınlar Günü» münasibətilə Zirə EKO parkda tədbir təşkil edilmiş, bayram süfrəsi açılmış, 50 nəfər fəal qadın RİH-nin Başçısı tərəfindən mükafatlandırılmışdır.
16 mart tarixində «Ölkəmizi tanıyaq» tur aksiyası çərçivəsində Naxçıvan MR-a səfərə gedən məktəblilər yola salınmış, 19 mart tarixində qarşılanma mərasimi keçirilmişdir.
17 mart tarixində H.Əliyev Fondu tərəfindən rayonun 4000 nəfər aztəminatlı ailəsinə, şəhid ailələrinə, qarabağ əlillərinə və 4000 nəfər isə ünvanlı sosial yardım alan şəxslərə «Novruz» bayramı münasibətilə ərzaq yardımının paylanılması təşkil edilmişdir.
18 mart tarixində Binə qəsəbəsində Novruz bayramı münasibətilə bayram süfrəsi açılmaqla ümumrayon tədbiri keçirilmişdir. Tədbirdə RİH-nin Başçısı G.İslamov, Millət vəkili R.Əliyev, YAP rayon təşkilatının sədri N.Əhmədov, idarə - müəssisə, təşkilat rəhbərləri və sakinlər iştirak etmişlər.
31 mart Azərbaycanlıların Soyqırımı ilə bağlı 123 №-li məktəbdə Anım mərasimi keçirilmişdir.
2017-ci ilin may ayında Ulu Öndər Heydər Əliyevin anadan olmasının 94-cü ildönümü münasibətilə YAP rayon təşkilatı ilə birlikdə rayonda silsilə tədbirlər keçirilmişdir. Rayon ictimaiyyəti nümayəndələrinin iştirakı ilə Ulu Öndər H.Əliyevin məzarı ziyarət edilmiş və H. Əliyev Mərkəzinə səfər təşkil edilmişdir. H.Əliyevin xatirəsinə həsr edilmiş futbol, güləş yarışları təşkil edilmiş və qaliblər mükafatlandırılmışlar. Bundan əlavə Buzovna-Şüvəlan magistral yolunun ətrafında ağacəkmə kompaniyası keçirilmişdir.
9 may - Qələbə günü, 28 may – Respublika günü , 15 iyun- Milli Qurtuluş günü münasibətilə də bir çox tədbirlər həyata keçirilmişdir.
23 iyun 2017-ci il tarixində Xəzər RİH-i Aparatında Dövlət Qulluqçularının peşə bayramı münasibətilə geniş tədbir keçirilmiş və rəhbərlik dövlət qulluqçularını bayram münasibətilə təbrik etmiş, Azərbaycan Respublikası Prezidentinin sərəncamı ilə Xəzər RİH-i Başçısı Aparatının şöbə müdiri Əfsar Xasay oğlu Mirzəliyevin «Dövlət qulluğunda fərqlənməyə görə» medalı ilə təltif olunmasını və bunu Xəzər rayon ictimaiyyətinə verilən xüsusi qiymətinin təzahürü kimi vurğulamışdır.
Azərbaycan Respublikasının Prezidenti cənab İlham Əliyevin tapşırığına əsasən əhalinin tibbi müayinədən keçməsi ilə əlaqədar olaraq 15 fevral- 15 may 2017-ci il tarixində rayon əhalisinin 108114 nəfəri tibbi müayinədən keçmişdir.
Rayon rəhbərliyinin təşəbbüsü ilə 01 iyun –22 iyun 2017-ci il tarixində «Səyyar ASAN» xidmət avtobusu rayonun Türkan və Zirə qəsəbələrində olmuş və 1500-ə yaxın sakin xidmətdən yararlanmışdır.
2017-ci ilin 6 ayı ərzində Xəzər rayon İcra Hakimiyyəti Aparatına 1383 ərizə, şikayət və müraciət, 1204 xidməti sənəd daxil olmuşdur. Daxil olmuş 1383 ərizə və müraciətlərdən 494 ərizə müsbət həll edilmiş, 790 ərizə və müraciətə lazımi izahat və təkliflər verilmiş, 6 ərizə aidiyyatı üzrə göndərilmiş, 6 ərizə əsassız sayılmış, 54 ərizə isə icraatdadır. Müqayisə üçün qeyd olunmalıdır ki, daxil olan ərizə və şikayətlərin sayı ötən ilin müvafiq dövrünə nisbətən 22 % azalmışdır.
Hesabat dövründə Xəzər rayon İcra Hakimiyyəti Başçısının qəbulunda 43 vətəndaş olmuşdur. Ötən dövrdə vətəndaşların İcra Hakimiyyətində qəbul edilməsinin və müraciətlərinə baxılmasının bir qismi elektron formada həyata keçirilmişdir.
2017-ci ilin birinci yarısında RİH-i Başçısı tərəfindən qəsəbələrdə 12 səyyar qəbul keçirilmiş və bu görüşlərdə 1359 nəfər vətəndaş iştirak etmiş, 41 müraciət səsləndirilmişdir. Müraciətlərdən asfalt örtüyünün salınması, təbii qaz problemləri, su-kanalizasiya və nəqliyyat problemləri üstünlük təşkil etmişdir. Səyyar qəbullarda səsləndirilmiş müraciətlərin əksəriyyəti müsbət həll olunmuş, digər məsələlərlə bağlı isə aidiyyatı qurumlara məktublar göndərilmişdir.
Keçirilən səyyar görüşlərdə Millət vəkili Rauf Əliyev də iştirak edərək sakinləri narahat edən problemlərin həlli istiqamətində görülmüş və görüləcək işlər barədə ətraflı məlumat vermişdir.
Azərbaycan Respublikasının Prezidenti cənab İlham Əliyevin 10 aprel 2017-ci il tarixdə keçirdiyi müşavirədə Yerli İcra Hakimiyyətlərinə də bir sıra tapşırıqlar vermişdir. Bunlardan biri də yerli və xarici investorların cəlb edilməsilə ərazidə istehsal müəssisələrinin, sahibkarlıq subyeklərinin yaradılması, eləcə də yeni iş yerlərinin açılması ilə bağlı olmuşdur. Cənab Prezidentin tapşırığını rəhbər tuturaq Xəzər RİH-nin müvafiq şöbələrinə, qəsəbə nümayəndələri və bələdiyyə sədrlərinə yerli və xarici investorların rayonumuza cəlb edilməsi istiqamətində daha səmərəli fəaliyyət göstərmələri, aidiyyatı idarə, müəssisə və təşkilat rəhbərlərinə isə onlar üçün lazımi şəraitin yaradılması məqsədilə müvafiq işlərin görülməsi tapşırılmış və bu işlər ciddi nəzarətə götürülmüşdür.
Prespektivdə Xəzər rayon İcra Hakimiyyəti tərəfindən aparılan abadlıq-quruculuq işləri çərçivəsində Şüvəlan qəsəbəsi, A.İldırım küçəsindəki daha 2 binanın təmir-bərpa işlərinin davam etdirilməsi, orada yerləşən istirahət parkındakı yenidənqurma işlərinin başa çatdırılması, Mərdəkan, Binə və Buzovna qəsəbələrindəki bəzi hündürmərtəbəli binaların təmir edilməsi, Binə qəsəbəsində yeni istirahət parkının tikintisi, qəsəbədaxili küçələrə asfalt örtüyünün salınması, qəsəbələrin ərazilərində yolların kənarlarında yaşıllıqların salınması və bu kimi digər işlər durur. Əmin ola bilərsiniz ki, bu işlərin öhdəsindən də layiqincə gələcəyik.
Xəzər RİH-i sakinlərin rahat, firavan yaşamasına yönələn bu kimi layihələrin həyata keçirilməsi üçün müvafiq işlər görəcək, qarşıdakı dövrdə də Azərbaycan Respublikası Prezidentinin fərman, sərəncam və tapşırıqlarının vaxtında və keyfiyyətlə icrası, vətəndaşlarımızın layiq olduqları rifahlı yaşayışın təmin edilməsi üçün bütün imkanları səfərbər edərək qarşıya qoyulan vəzifələrin öhdəsindən layiqincə gəlməyə çalışacaqdır.
Diqqətinizə görə sağ olun!
